تعليقات ( 16 )

1. 

   28 ديسمبر 2009
   3:31 م

   temsa7 قال :

   لووول الموضوع الغايب الحاظر
   القديم اليديد
   اللي ماله حل في الدنيا كلش

   شكلنا بيحولونا تقاعد كلنا
   الله يستر علينا انشالله

2. 

   28 ديسمبر 2009
   4:35 م

   Noor قال :

   اول شي احب اشكرك اخوي على هالمواضيع اللي تطرحها للنقاش
   صراحه ذكرتني بايام ماكان النت مايعرفونه اليهال
   ايام ماكانت المنتديات تنطرح فيها مثل هالمواضيع للنقاش وناس عاقله ترد وتناقش
   وان شالله التفاعل والنقاش في هالموقع يزيد
   \\
   بخصوص الموضوع
   انا وحده مع حقوق المرآه والمطالبه فيها لكن بحدود !!
   يعني من حقها تتعلم .. لان هالشي بينفعها وبينفع بلادها
   ومن حقها تشتغل .. بس انا اشوف ان مب اي شغل يصلح لها
   في اشغال تصلح لطبيعه الحريم وحياتهم
   واشغال لا
   انا لين الحين مب متقبله ان المرأه اداوم شفتات !!
   اوكي يمكن اذا عزوبيه بتمشي حالها ” مع ان بعد احس الاهل يتضايقون”
   بس اذا متزوجه ووراها بيت وعيال !! اذا الريال سكت مب معناته انه مرتاح .. والعيال نفس الشي
   احس بتكون حياتها مشتته ومتخربطه
   لازم تشوف الشغل اللي يتوافق مع طبيعه حياتها
   عشان ترتاح
   وفي اشغال خلت الحريم ينسون انوثتهم !! << مابي اتعمق وايد في هالموضوع لان ان فتحته بيكون ماله نهايه
   \\
   هم مشو على مقولة "حقووق المرأه"
   لو مخلينها "حقوق المرأه التي تتوافق مع طبيعتها "
   كان ماتحندو الشباب وقالو خذو حقوقهم وزياده p:
   \\
   يعطيك العافيه اخوي
   ولي عوده بعد ماشوف ردود الباقي
   << رد ع السريع بدون مراجعه ينطروني بنطلع هههههه

3. 

   28 ديسمبر 2009
   5:37 م

   sulitilord قال :

   السلام عليكم.
   انا بعد مع حقوق المراة, فهيا نص الرجل, و المجتمع مايكتمل بدونها.
   بس ابي اقول انا في كل شي حدود, انا مابي يعطونة حقوق يمكن تؤدي الى زوال انوثتها.
   مثل الغرب, بس شوفو هل الشيفة:
   http://www.youtube.com/watch?v=fbwRB3GgdBY
   بصراحة من منكم يقدر ينادية انثى؟
   خواتنا, و بناتنا على عنينا و راسنا, الحمد للالة انا لهم دور ايجابي في البلد.
   بس المهم ما يضتهدون الرجل, او يلعبون براسهم تحت اسم حقوق.

4. 

   29 ديسمبر 2009
   12:41 ص

   W7 قال :

   مراحب
   اخوي ( تمساح )\\
   اي والله الله يستر
   //
   \\
   خيتو ( نور )
   الحمدلله ان الموضوع فيه نقاش
   احنا كلنا مع حقوق المراه .. دامني مسلم اكيد بكون مع حقوق المرأه بدون ما انطقها..
   بس مو ملاحظه الحقوق زايد عن حدها في مواقف؟
   انا ما قلت ما تتعلم .. يعني التعليم ما بغى ايي الا بالدراسه برع يعني؟
   يعني اذا ادرست يعطونها كل التخصصات ومايعطونا احنا؟
   و يعني اذا اهيه اشتغلت ما يصير احنا نشتغل؟
   واذا اهيه تعلمت و اشتغلت .. احنا ما عندنا حد نتزوجة!!
   وعقب يقولون وين راحوا شبابنا .. وياخذون من برع ..
   .. بالعمس تعمقي .. بالموضوع .. يمكن يطلع من وراه كراكتير ثاني ..
   وحياج اختي ..
   //
   \\
   أخوي (السليطي لورد )
   نفس الشي انا اقول دامنا مسلمين و نؤمن بدينا اكيد نؤمن بحقوق المراه
   مو محتاجين حد يقولنا لان دنيا امرنا بهالشي و الحمدلله ان احنا خير امه ارسلت ..
   بس عجبتني جملتك (يلعبون براسهم تحت اسم حقوق ) ..
   بس مافهمت الفيديو وما يبين شي كله ظلام ؟
   وشاكر لك مشاركتك
   //
   \\

   وتحياتي لكم
   W7

5. 

   29 ديسمبر 2009
   3:27 م

   Noor قال :

   ياهلا اخوي ..
   ان شالله نلاقي تفاعل اكثر في النقاش
   لان متاكده مواضيع النقاش بتعطيكم افكار يديده للرسم =)
   \\
   اي في مواقف زايده عن حدها ماننكر هالشي
   بخصوص التعليم برى
   التعليم برى او اهنيه من حقها مثل ماهو من حق الريال
   بس على حسب
   في بنات تسمح لهم ظروفهم يدرسون برى وبنات لا
   مثلا بالنسبه لي فكرت فيها
   اولا انا ماقدر استحمل اقعد بعيد عن اهلي شهوور وسنين
   اذا الشباب تصعب عليهم مرات شلون البنات !!
   ثانيا مستحيل اروح بروحي .. انا بنت !!
   ولو تبرع اخوي وتكفل انه يروح معاي .. شذنبه !!
   السالفه مب شهر ولا شهرين
   السالفه يبي لها سنين .. ليش اعبل اخوي معاي ؟؟
   بس من ناحيه ثانيه في بنات ظروفهم تسمح
   يمكن اخوها ولا ريلها بيكون معاها ويدرس
   يعني ارد واقول “بما يتوافق مع طبيعتها” وازيد “ظروفها ” =)
   \\
   وبالنسبه للشغل
   ماننكر ان هالايام راتب واحد للصرف على البيت مايكفي !!
   يعني لازم المره تساعد ريلها
   وتشتغل شغله مناسبه وتحاول انها توفق بين بيتها وشغلها
   ومب معناته ان اي وحده تشتغل بتكون مهمله في بيتها
   فالاول والاخير الموضوع يعتمد على المره نفسها
   وشلون تقدر تشوف الشغل اللي يناسبها ويناسب ظروفها
   ” مع ان في ناس تجبرهم ظروفهم الصعبه يقبلون باي شغله حتى لو كانت متعبه .. هذول مانقدر نقول الا الله يعيينهم”
   \\
   بس في شغله ثانيه بخصوص شغل المره >== بدش موضوع ثاني ^_^
   تذكرت مقال من فتره شوي طويله ” نسيت صراحه من اللي كان كاتبه اذا حد يعرف ياليت يذكرنا”
   ان شغل المرآه سبب من اسباب الطلاق لانها صارت تشوف انها تقدر تعيش حياتها بدونه
   وهالشي صحيح في بعض الحالات..
   المرآه قبل كانت تتغاضى عن الاخطاء والخلافات البسيطه وحتى الكبيره كانت تحاول تحلها
   وكانت تقول هذا ريلي ومالي غيره اذا طلقني بضيع
   لكن اليوم شتقول ؟؟!!!
   انا مب في حاجته انا اشتغل وعندي راتبي يكفيني ويزيد ومب عيزانه من عيالي
   حتى لوكان السبب تافه !!
   \\
   اكتفي بهالكلام
   بس لي عوده اذا لزم الامر :p

6. 

   29 ديسمبر 2009
   4:21 م

   N_Alkuwari قال :

   بصراحه الموضوع وااايد شيق !
   انا مع حقوق المرأه بس مو بشكل زيادة عن اللزوم يعني للمرأه حقوق و الرجل حقوق ! و لو شنو سوينا لازم ما تتسوا

   لان الرجل له طاقاته و المرأه نفس الشي ..
   يعني اوكي خل المرأه تدرس و تشتغل عادي ،، بس تتخيل لو وحده تصب بترول ؟! شنو بيسير ،، و لا نقله وحده كهربجيه !! o_O مو بالعقل المرأه تشتغل بالوظايف ،. طاقاتها ما تسمح لها ..
   قال الرسول ” ما فلح قوم ولوا امرهم امرأه”

   و غير سالفه ان المرأه تشتغل شفتات و انا طبعا وااايد معارضه هالنقطه .. شلون البنت او المرأه تناوب !!
   يعني اوكي احنا متفتحين و غيره بس مو لدرجه ان الزوج في البيت قاعده ينطر مرته .. و هذا لازم يكون العكس!

   ههههه الموضوع خلاني اشتط و اكتب وااايد
   تسلم W7 على الموضوع رووووووعه و الكاركتير .. عجييييب .. يعطيك العافيه ..

7. 

   29 ديسمبر 2009
   6:31 م

   Mariam قال :

   الموضوع شدني وايد ويمكن اعلق وايد بس معليه استحملوني :$ لول
   ..
   اول شي انا باتكلم بخصوص حقوق المرأه اللي تعدت حقوق الرجل ، مب عشان انا بنت او غيره لكن احس ان احنا وايد متعادلين بالحقوق او نقدر نقول الرياييل عندهم حقوق اكثر ، وانا ما اعترض بالعكس الرياييل هم اللي المفروض يكون لهم حقوق اكثر من المرأه لان مجتمعنا مايسمح للمرأه انها تطلع وتكلم وتناقش.
   وطبعا الخجل جزء مهم فهالموضوع لكن اذا على الحيا ف للأسف نقول ٧٠٪ من النساء فقدوا هالجزء ومستعدين يسوون كل شي عشان يطلعون نفسهم هو شي حلو وبنفس الوقت مايناسب عاداتنا وتقاليدنا .. !
   ونلاحظ ان واااايد من النساء صاروا يعتمدون على نفسهم في اشياء وايد ..
   ..
   وبالنسبه لموضوع جامعة قطر ههههههه لا والله اذا على جامعة قطر محد مرتاح فيها احنا ماعندنا دكاتره وايد زينين وعالأعذار والله مايقبلون أي عذر !
   انا اللي هاي اللي شفته من خلال تجربتي في جامعة قطر ، يقولون مانقبل أي عذر لغيابكم غير اذا حد توفى “ومن الدرجه الأولى” الله يكفينا الشر ، يمكن في دكاتره يقبلون بس الباقي يقولون قانون من الجامعه :/
   اما البويات موضوعهم معقد شوي هو يمكن يكون ٣٠٪ بس عشان حقوق المرأه أو التفتح اللي صاير وان البنت صارت تعتمد على نفسها اكثر من الريال.
   وبعد هالشي ممكن يصير من التربيه فالبيت أو البيئه اللي عايشه فيها ، يعني اسباب وايد والبويات بروحهم موضوع طويل ، وفي جوانب وايد اناقشها.
   لكن انا باقول اللي انا اشوفه سبب رئيسي هو ان دايما “تصرفات البنت برع تعكس تصرفاتها في البيت وطريقة تربية الام والاب” وتربية البنات تكون عالام اكثر شي.
   اما حقوق المرأه وهالاشياء نقدر نقول “شجعتهم” اكثر.. الله يهديهم يارب !
   اسمحلي عالاطاله بس فعلاٍٍ موضوع يستحق النقاش (Y)
   ولحد الآن مواضيعك اكثر من روعه
   ورسماتك احلى (Y) يعطيك الف الف عافيه ياw7

8. 

   29 ديسمبر 2009
   8:17 م

   tatooma قال :

   اول شي .. انا من وجهة نظري انه المرأه في دينا ماخذه
   حقها وزياده..وحقوق المرأه ياتنا من الغرب لانه هم اصلا ما كان عندهم حقوق للمرأه…
   وبالنسبه انه المراه صارت تتعلم وتشتغل .. مثل ما قالت نور
   المراه لازم تدرس وتشتغل “بما يتوافق مع طبيعتها وظروفها ”
   وفي حدوووود لمجال عمل المراه …
   ويفترض انه المرأه العامله تختار الشغل اللي يناسب ظروف بيتها
   وتنظم وقتها على ان الأولويه للبيت ..
   ومن جهه اخرى … الشباب هم ماعطين هالفرصه للبنات ..
   وانا ناقشت الموضوع مع ربعي .. ومثل ما قالت وحده منهم
   “”الشباب مريحين نفسهم وما قاعدين يثبتون نفسهم ولا يتقدمون “”
   واصبح تفكيرهم سطحي <<وهالنقطه للجهتين الشباب والبنات بعد
   وبعضهم اللي يبي يتزوج يدور له وحده تشتغل عشان هو يرتاح
   :
   يعني "حقوق المرأه الزائد عن حدها " بسبب الطرفين المرأه والرجل
   :
   ويعطيك العافيه اخوي على طرح الموضوع الشيق
   والكارتون حددده فلله وعجبني .. يعطيك العافيه
   والسموحه على الأطاله

9. 

   29 ديسمبر 2009
   11:48 م

   W7 قال :

   مراحب..
   //
   \\
   هلا مرحبا فيج خيتو ( نور ) ..
   تعقيبي على كلامج بخصوص الدراسه برع ..
   انا ما اقصد مع المحرم .. بالعكس اشجع ..
   بس المقصد من كلامي .. وقت اقصد تروح بروحها
   و بالذات اذا كانت توها في بدايه عمر الشباب ..
   هذا الي اقصده وقت تكون توها بعمر الشباب و توها تبتدي تتعلم الحياه..
   وقت اي وقت التعلم الصح تروح تتعلمه برع و ترجع تطبقه اهني ..
   شي بديهي كل شي راح يكون غير بالنسبه لها ..
   و بترجع وهيه في جعبتها الكثير من الاشياء الغريبه عن مجتمعنا ..
   الي اسميه هالمجتمع الي ماعاد في شي يميزه مع هالخلطات الي تصير ..
   وانتي نفس الشي قلتيها ( الي تجبرهم الظروف ) ..
   انزين الي ماتجبرهم الظروف ليش يختارون هالاختيار؟ دامهم مو مجبورين..
   وكلامج صحيح و هذا الي قلته الحين مع هالتطورات و الحقوق ما عادت المرأه محتاجه للرجل دامها تقدر تشل نفسها ..
   وهذا الي زايد نسبه العنوسه و الطلاق .. و شبابنا يدورون على حريم من برع بلادنا..
   و شكرا على هالمداخله الطيبه ..

   \\
   //
   مراحب ( ان-الكواري)..
   احم احم .. بخصوص .. لو مثل ما تقولين البنت تشتغل كهربجيه ولا تصب بترول!!
   عيل ليش فاتحين على قوله الناس تخصصات الهندسه البتروليه و الكهربائيه و العمرانيه عن البنات في جامعه قطر, على غلاف عدم تواجدها عند الشباب؟ هذا السؤال الصح..
   عادي بعد كم سنه قالوا دام عدد النساء في تكاثر بنشغل الحريم و بنقعد عقب احنا الرييايل في البيت و الحريم الي يصرفون علينا..
   و بخصوص الناس طاقات .. الحين ما شاء الله الحريم يبون كل الطاقات مع هالانفتاحيه ..
   الي تبي تكون سفيره و لا وزيره ولا مديره صايره تناطيح الريياييل على المناصب؟
   هذا كله ليش عشان تقول انها تقدر ولا تنصف المرأه؟ ما اعتقد احنا كمسلمين مقصرين بحق المرأه.. ( الا من رحم ربي ) ..
   العفو في خدمتكم و ان اشاء الله القادم اروع ..
   //
   \\
   مرحبا خيتو ( مريم ) ..
   بالعكس كل ماكبر التعليق كل ما صار في شي يشد و يمكن تطلع منه افكار..
   وبخصوص جملتج ابي احطها بين قوسين (لان مجتمعنا مايسمح للمرأه انها تطلع وتكلم وتناقش)..
   اي مجتمع الي ما يخلي المرأه تناقش .. انتي ليكون قاعده في الصاله ومافيها تلفزيون؟
   عيل من الي يطلع في كل هالقنوات ؟ اذا قنوات الخاصه بالرجال تطلع فيه نساء مثل الكوره و الالعاب الرياضيه ..
   ومن الي يدخل نقاشات و يطلع على الهواء و يتكلم ؟
   كل هالبنات و للحين ما يبينون بعينج؟ الحين مثلا الممثله القطريه (ما اعرف اسمها)
   على اعتبار اول ممثله قطريه (بعد هديه سعيد) في سن الشباب تطلع على التلفزيون..
   المهم .. وقت اسؤلوها على الهواء مباشره .. ترضين لو طلعوج في دعايه شامبو؟
   اهيه شنو ردت عليهم؟ قالت عادي بالعكس اجرب شي جديد !! (هاي الي باقي)..
   هذا شي اجباري و حق من الحقوق الي تسمونها؟ (ترى انا مو ضد المرأه بس اناقش)..
   و بخصوص جملتج ان البنت او الاصبي يعكس سلوك البيت!!
   بصراحه انا ضد هالجمله مليون و احط تحتها الف خط .. البيت ماله خص ..
   فوق هذا كله الله رزقنا بعقل نفكر فيه نختار .. البيت صح له حدود بس مو كل الحدود..
   ماحب حد يقول اي شي غلط يعود على البيت ..
   وايد بيوت صالح ويطلع ولد ولا بنت مو على سراط مستقيم ..
   ووايد بيوت والعياذ بالله فيها الفساد ويطلع منها ولد ولا بنت صالحين..
   و يسلمو على هالمداخله..
   //
   \\
   ومراحب (تاتوما) ..
   نعم .. نعم .. نعم .. هذا الي ابي اقوله .. في اشياء جايه من برع ..
   هذا الي ابي احد يقوله من مساعه ..
   كل شي هالدنيا سلاح ذو حدين .. الي يبي يستعمل الصح بيستعمله ..
   و الي يبي يستعمل الغلط بيستعمله ..
   بس احنا ليش نقول كله من الاجانب .. ليش ناخذ من عندهم الغلط و نخلي الصح؟
   ما شاءالله علهم اهمه .. شوفوهم .. ياخذون من عندنا الصح و يخلون الغلط ..
   و احنا نسوي العكس ؟ ليش ؟ لهالدرجه النقص و الرياء عندنا طالع بزود؟
   اشلون الشباب معطين البنات هالفرصه؟
   تعالي اشوي معاي بدخلج في سيناريو (تخيلي معاي)..
   وقت تقولين الشباب معطين البنات الفرص ..
   الشاب ليش يقصر على عمره في حالات (الا من رحم ربي و يبي يفاشر عشان يقول انا عندي)..
   يقصر من عمره اشوي عشان يجمع الي يقدر عليه عشان ياخذ الي يقدر يسعدها ..
   اذا اهوه يبي يصي احسن طيار ولا احسن دكتور ولا احسن مهندس ..
   بأمانه .. جاوبي بأمانه .. بيقدر يكون احسن زوج؟ بيقدر يتواجد كل يوم؟
   بيقدر يراعي عياله؟ ولا بيقدر يلعبهم ولا بيقعد يسولف مع مرته؟
   اهوه يتنازل بالقليل عشان يعطي اهله الكثير..
   احنا كعرب نحن الاسره و نحب نحب حريمنا و نكون لهم (هذا اذا ظل مثل ما اهوه)..
   و الحين . للحين في بالج الشباب الي معطين البنات فرصه ..
   انتي ما تدرين في شباب في قطر .. بس لو يلعب معهم الحظ شوي .. اوصلوا لاشياء ما يوصلونهاا.. و السبب الواسطات الي تدخل بينهم ولا محد يبي قطري لازم اجنبي ..
   مع انه يحاول يصنع حظه .. بس بعد .. (الله المستعان )..

   و شكرا على المداخله ..
   //
   \\
   وشكرا جميعا
   وتحياتي
   W7

10. 

    30 ديسمبر 2009
    11:23 ص

    Noor قال :

    مرحبا مره ثالثه ^_^
    //
    اي فاهمه قصدك
    انا بينت لك انا مع اي ظروف وضد اي ظروف
    ضد ان البنت تروح بروحها تدرس برى في حاله ان اللي بتدرسه موجود اهنيه
    ضد انها تشتغل في شغل مايناسب طبيعتها كمرأه في حالة انها تقدر تشتغل في اي وظيفه ثانيه مناسبه
    وضد انها تشتغل اصلا اذا الشغل بياثر على حياتها تاثير سلبي
    وفي شي ثاني بعد مهم..
    ضد انها تتحرر زياده عن اللزوم وتنسى دينها وعاداتها وتقاليدها تحت مسمى ” حقوق المرأه وحريتها”
    <<== مفهوم الحريه الغلط يبي له موضوع بروحه بعد
    //
    ويعطيكم العافيه جميع ع الردود =)

11. 

    1 يناير 2010
    2:26 ص

    Kholood قال :

    انا مع حقوق المرأة
    ومع فتح المجال لها في التعلم والشغل
    والحمدلله ان الحين الوظائف تنوعت، وما عادت محصورة في التعليم والصحة مثل قبل واللي كانوا البنات يقعدون بالسنين لحد ما يتوظفون
    اما الحين الوحدة ممكن تتوظف واذا ما عجبتها الوظيفة ممكن انها تدور غيرها لحد ما تلقى الشي اللي يرضيها ويرضي طموحها

    وليش نعترض على هالشي؟؟ مب البنت مثل الولد لها حياة بتعيشها مرة وحدة ولازم تحقق ذاتها فيها؟؟

    عن نفسي ما احب اشتغل شفتات ولما قالوا عندنا في الدوام انهم يبونا نشتغل شفتات لعبت بكرت الاهل انهم ما يرضون اني اشتغل وقت متأخر مع اني احيانا اتأخر في دوامي لحد ال9 على حسب الظروف بس بعد ما احب اني اكون مجبورة على هالشي
    لكن احيانا الوحدة تضطر انها تشتغل شفتات خصوصا اذا كانت ممرضة او دكتورة.. كل واحد على حسب ظروفه

    وقبل كانت المرأة مالها معيل الا زوجها فكانت تتغاضى عن اخطاءه ومشاكله، بس الحين خلاص المرأة مستقلة وتقدر انها تعتمد على نفسها وتصرف على نفسها فما عادت تستحمل الظلم اللي ييها من ريلها
    وليش تتحمل؟
    الحياة قصيرة والواحد ليش يعيشها في الهم

    انا ما اقول ان عند اول خلاف الوحدة تقط ريلها، بس اذا ما كان في امل في الاصلاح تعيش معاه مذلولة؟؟

    وفي عوايل قايمة على رواتب البنات اللي تشتغل فيها، وهم يكونون اللي شايلين وفاتحين البيوت واخوانهم مامنهم فايدة
    وبعدين يقولون ليش المرأة تاخذ هالكثر حقوق؟؟

    بالعكس لها حقوق لازم تاخذهم
    كفاية الكبت اللي كانت فيه طول السنين اللي فاتت

    طبعا في حدود حق كل شي.. اولها الحدود اللي الاسلام يحطها مب العادات والتقاليد اللي مكبلة الواحد ومقعدته في بيته ما يسوي شي..

    وثاني شي اللي الواحد يتقبله غيره مايتقبله وما في داعي نجوف الناس كلهم غلط بس لانهم مب مثلنا

12. 

    1 يناير 2010
    12:56 م

    W7 قال :

    مراحب هلا خيتو ( نور ) ..
    بصراحه اشكرج على هالمتابعه الطيبه …
    //
    \\
    هلا بأختي ( خلود ) ..
    ما شاءالله رد جديد .. و شخن بصراحه ..
    اختي مثل ما قلنا احنا كلنا مع حقوق المرأه و دامني مسلم ( دامج جبتي طاري الاسلام بدون العادات و القاليد ) .. اكيد بيكون خقوق المراه عندنا قبل لا يطلع حقوق للمرأه ..
    و بصراحه هالكلمه اشوفها عادات دخليه على مجتمعنا ..
    ومن فينا ما يبي يشوف بنته تتعلم ولا ما تشتغل شغله طيبه ..
    و بخصوص جملتج البنت مثل الولد ؟ جوابي طبعا لا مب مثل الشي و عمرهم ما راح يكونون نفس الشي, دامج مره ثانيه دخلتي الاسلام بالموضوع .. جوابي لج من باب الاسلام ..
    ( بس مابي ادخل في امور الاسلام وايد عشان محد فينا يفتي و يؤثم عليها عقب )..
    الولد له طاقاته و حدوده و البنت لها طاقاتها و حدودها .. و الحين البنت قامت تاخذ دورها و دور غيرها .. هذا ما يعتبر حق هذا يعتبر تعدي على حقوق الغير ..
    و المعروف ان حريه الشخص تتوقف عندما تدخل في حريه الغير .. ولا شنو رايج انتي؟
    و يعني لو بتعيش مره وحده يعني تسوي كل شي و تدخل الغلط معاه و الغير معقول معاه؟
    حتى الاصبي بيعيش مره وحده و اذا كل واحد بيقول هالجمله .. عيل على الدنيا السلام اكثر من ما عليها الحين ..
    و بخصوص الشفتات انا معاج في هالنقطه تعتمد على الظروف .. بس حزات ليش البنت تختار ظروف اهيه مو مجبوره عليه؟ دام عندها خيار بديل ليش تختار هالخيار؟
    انا صادفت هالموقف وقت مره كنت في الطوارئ حمد .. شفت وحده تقريبا تشتغل في الساعه 2 الفجر انا استغربت بصراحه و بالذات اذا اقطريه ..
    خليت اختي تسالها اشلون تشتغل بهالوقت وعادي اهلها موافقين و اذا زوجها موافق ولا لا؟
    جوابها كان : انا مو متزوجه وما فكر اني اتزوج .. !!
    بصراحه ضحكت على ردها وقت عرفت .. البنت وقت تقول هالشكل اهيه تعرف انها مسويه شي بيقطع رزقها ( نص دينها ) .. و عقب تقول لا انا اصلا الي ما ابي ..
    يعني شنو الحكه انها يازعم مثل ما قلتي ( توصل طموحها ) انها ما تكون عيله ؟
    هل هذا شي يستاهل التضحيه عشانه ؟؟؟ ( بصراحه اسمع اعذار مالها شغل ) ..
    و بخصوص جمله ( الحياه قصيره و ليش نعيشها في هم ) .. هالجمله البنت ما قامت تقولها الا وقت حريتها تعدت المعقول و بوايد .. محد في هالدنيا ما راح ايه يوم و يكون فيه مهموم الا لو ما عنده قلب .. و دام البنات يقدرون يشلون نفسهم ومو محتاجين و دام من الزعل بيهدمون بيت لانها تقدر تشتغل وتصرف على نفسها ..
    بصراحه ما الووم الشباب وقت مايبون يتزوجون وبالذات ما يتزوجون قطريه .. !!
    و لاحظي الكلمه الي استعملتيها في اسلوب الرد ( انا ما اقول ان عند اول خلاف الوحدة تقط ريلها ) .. ملاحظه كله “تقط” كانج تقولين ان البنت اهيه الي متزوجه الاصبي و تقدر تتركه في اي وقت تبينه .. شفتي الحقوق لين وين اوصلت ؟
    وهم بعد عن نقطه الكبت الي عاشته طوال هالسنين !! ممكن تفسرين كلمه كبت!
    اي كبت م اشوف مجتمعنا فيه كبت من ناحيه حقوق المرأة ..
    و مثل ما قلتي و دخلتي الاسلام مره ثانيه و بين العادات و التقاليد..
    اذا انتي متوقعه العادات و التقاليد اهيه الي كانت مقيده المراه من اشياء .. صدقيني لة احنا انطبق الاسلام 100 % … جان بتقولين اتمنى العادات و التقاليد اهيه الي تمشينى ..

    و بالاول و الاخير .. الناس اراء و اذواق و لو ما اختلفت الاراء و الاذواق ما وصلنا الي ما وصلنا اليه في هذي الحياه .. و شكرا على المداخله الطيبه
    //
    اخوكم
    W7

13. 

    1 يناير 2010
    2:29 م

    Kholood قال :

    احنا مشكلتنا في مجتمعنا نقول ان احنا مجتمع اسلامي لكن اللي يمشينا العادات والتقاليد

    الخلع مثلا اللي هو من ابسط حقوق المرأة في الزواج
    من كم سنة دخل عندنا في القانون؟؟؟
    وهو من ايام الرسول من حق المرأة انها اذا ما تبي زوجها انها تخلعه مثل ما زوجها يقدر يطلقها

    احنا ما نقول لا الشرع غلطان ان المرة لازم تساوي الريال في الورث وهالكلام

    لا بالعكس.. الشرع ما قال هالشي الا علشان حكمة
    وطبعا الريال عليه مسؤوليات اكبر من المرأة لانها بحكم الشرع مب مجبورة انها تصرف على البيت والعيال من مالها ولو كانت غنية
    وبما ان الرجل هو المجبور على هالشي فطبيعي ان يكون حقه الشرعي الضعف

    الرسول الكريم وصى على المرأة وقال استوصوا بالنساء خيرا
    وين اللي الحين تجوفه يستوصي بالنساء خيرا؟؟

    الرسول كان يساعد في بيته
    وين اللي الحين يساعد في بيته ويتبسم في ويه زوجته
    الكل يي من الدوام مكشر اللي يجوفه يقول انه كان شايل حجر على ظهره وهو دوامه الا مكتبي ومكيف وطول اليوم جرايد وكومبيوتر

    خلينا الاسلام صلاة وصيام وبس.. ونسينا ان الاسلام اسلوب حياة
    نسينا ان الاسلام في البسمة واماطة الاذى عن الطريج واحترام الصغير والكبير والعطف على الحيوان

    حكرنا الاسلام في المساجد ويوم الجمعة بالخطبة وبس وخلينا العادات والتقاليد الغبية اللي تحجر المخ هي اللي تحكمنا وتمشينا

    صرنا نسمع كلمة العيب اكثر من كلمة حرام

    الحياة قصيرة اي
    مب معناها نعيشها في الغلط
    بس معناها ان لازم نستغلها
    مايصير نموت واحنا ما خلينا بصمتنا في الدنيا
    والا شنو الفرق بينا وبين الحيوان ؟؟
    وهالبصمة ممكن تكون باي شكل من الاشكال

    كانت في تكوين عيلة
    كانت في اعمال ومؤسسات خيرية
    او كانت في علم نفعنا فيه نفسنا وغيرنا

    المهم نخلي بصمة لنا في الدنيا من ورانا

    بس مثل ما قلت
    كل واحد له راي ورايه معتمد على البيئة اللي تربى فيها مع اراءه الشخصية اللي تولدت نتيجة تجاربه
    فمستحيل كلنا نتفق على نفس الراي

    بس رسومك حلوة اخوي ^^
    واسلوبك مميز

14. 

    1 يناير 2010
    4:02 م

    W7 قال :

    .. ما شاءالله الرد طويل .. ( شي يفرحني بصراحه ) ..
    بخصوص الخلع .. من قال مو موجود .. كان موجود من زمااان بس محد كان يعرفه الا وقت الموضوع و سالفته انشهرت .. ووايد حريم ما كانوا يعرفون بخصوصه .. وهذا كل البعد مله خص بالتقاليد و العادات ..
    و ثانيا .. اختي خلود .. انتي ليش شايله كل هاي بقلبج بخصوص الخلع و الزواج و الرجال بشكل عام؟
    بأي ق مثلا تكون كلمه ( خلع ) من ابسط حقوق المرأه !!
    كانج تقولين .. ( الفرح بين الزوجين ) و ( حنان الزوج ) و ( الثقه ) .. شي اجباري و من اكبر الحقوق .. كانج تقولين الخلع و كانه شي عادي ..
    و نفس الشي ما نقدر نخلط كل الرجال نفس الشي ولا كل النساء نفس الشي ..
    تعقيبا على جملتج ( الكل يي من الدوام مكشر اللي يجوفه يقول انه كان شايل حجر على ظهره وهو دوامه الا مكتبي ومكيف وطول اليوم جرايد وكومبيوتر ) ..
    ترى مو الكل يكشر ..ولا نقدر نقول الكل يكشر .. ( يمكن الاغلبيه بس مانظلم الباقين)..
    //
    و بعد هم جملتج ( وطبعا الريال عليه مسؤوليات اكبر من المرأة لانها بحكم الشرع مب مجبورة انها تصرف على البيت والعيال من مالها ولو كانت غنية)..
    بعد دخلتي الشرع و الدين .. لو بتدخلين الشرع و الدين من حق الزوج يقول لزوجته كحق من حقوقه انها ما تشتغل و تقعد في البيت و تشوف امور البيت .. ودام غنيه ماله داعي تشتغل عيل .. و تسبب سين و جيم و دام ما تبي تصرف ..
    //
    و من الجملتين الاخيرتين .. ابرز كلمتين ( الخلع ) و ( عدم الاصراف ) ..
    وين تبين الريال يلتفت على وده اذا اول هالكلمات الي متصدرين قائمه امورها في الحيه الزوجيه .. و توج تقولين الواحد يرجع البيت و يكشر في وجه مرته .. و توج قلتي ان العلاقه الزوجيه مشاركه و حياه و ابتسامه .. و انتي وحده من قوم النساء و تكتبين ( مو ملزومه اصرف على البيت ) !!..
    //
    و نفس الشي مع البصات .. ترى حتى البصمات اذا بتبني شي صح على غلاف شي مو صح ..
    ما تعتبر بصمه .. البصمه وقت ما تلامس زعل اي طرف ..
    //
    و يسلمو الحمدلله الرسمات اعجبتكم ..
    و تحياتي لكم
    أخوكم
    W7

15. 

    14 يناير 2010
    1:46 ص

    Star قال :

    السلااام عليكم ..

    متابعه دائمه للموقع من اول ما تم افتتاحه، اهنيكم عليه، وبالتوفيق انشاءالله.

    أنا قريت التعليقات وبس عندي اضافه صغيره لشي محيرني عن موضوع الشغل، خلو البنات على صوب ماعندهم مسؤوليات وارتباطات عائليه يوصلون السما من حقهم وهاي شي فوق الجميل. أنا بس يعني أستغرب من الحريم اللي يشتغلون بوظايف ساعات العمل فيها طويله وشفتات ومناصب تتطلب دديكشن كبير والعيله تكون في آخر لسسته البرايوريتيز عندها.

    أنا بنت واعتقد كل بنت وأنثى طبيعيه بيكون عندها طموح وتبي تدرس وتنجز شي في حياتها شخصي عشان تحس بشعور جيد تجاه نفسها باللي حققته وأكيد تكوين عيله صالحه وابناء صالحين أكبر انجاز ممكن اي وحده تسويه، ام متعلمه لها كيانها وشخصيتها عندها شي تمرره لعيالها وقدره انها تدير عيله، واذا تكونت هالعيله صدقني ان هالشي بيكون لها كل شي في حياتها!!
    واعتبر هالشي فطره ابسط شي كل أم عيالها كل شي بالنسبه لها!!

    وبس للتوضيح، أنا أبدا مب ضد عمل المرأه بالعكس أشجعه واقدر كل أم طموحه تنجز أشياء لشخصها لأني أؤمن انها تسمتد طاقتها من هالانجازات الشخصيه وتعطي بيتها وعيالها، اللي قصدته فوق ساعات العمل الطويله لي المغرب والليل ونظام الشفتات (في الوضع اللي تكون غير مجبوره فيه) اللي يتضارب مع مسؤولياتها كزوجه وأم.

    اللي أبي اوصله من هاي كله، أن المره شاللي يحدها تترك هالحياه اللي انا متأكده ان راحتها فيها لان هالشي فطره!! وتروح تشٍقى برع وتترك وراها كل شي؟!! إذا الريال يتعب ويزهق ويرد مكشر، المره شلون تتحمل هالضغط؟؟

    هل متطلبات الحياه الصعبه تحدها عاى هالشي مساندة لزوجها؟!!
    هل عطائها في الاسره من جهه وحده وكل المسؤوليات (غير الماديه) عليها؟وتعبها مايلقى التقدير فتدور عليه في أماكن ثانيه؟!!
    هل المشكله في زوجها؟؟!! والعمل حجه وهروب من حياتها الزوجيه الفاشله؟؟!!

    يعني شي غريييب واعتبره خارج عن الفطره.

    السموحه ماعلقت عالموضوع الأساسي اللي هو حقوق المرأه بس ماقاومت اكتب رايي بخصوص اللي ناقشتوه قبل.

    يعطيكم العافيه.

16. 

    17 فبراير 2010
    7:01 م

    المهندي قال :

    انا اشوف ان الموضوع زاد عن حده ..

    خذوا حقوقهم وزود .. عن تجربه في حياتي ..

    بنات توضفوا بشهادات ثنويه وخلال 4 اسنين عمل صاروا سينير .. (( على اي اساس ومبدى )) مادري ..